2026-yil 1-yanvardan O‘zbekistonda tadbirkorlarni kompleks ro‘yxatga olish tizimi ishga tushadi, bu esa biznesni 15 daqiqada ochish imkonini beradi.
Adliya vazirligi prezident farmoni asosida yangi tartib joriy etilayotgani va u tadbirkorlik faoliyatini yuritish tartib-taomillarini soddalashtirishga qaratilganini ma’lum qildi. Tizim bir nechta davlat xizmatlarini birlashtiradi, shunda tadbirkor turli idoralarga murojaat qilishi va hujjatlarni rasmiylashtirish uchun haftalar sarflashiga to‘g‘ri kelmaydi.
Hukumatning hisob-kitoblariga ko‘ra, modelni joriy etish biznesning ma’muriy xarajatlarini taxminan 90 milliard so‘mga qisqartiradi va davlat organlari bilan o‘zaro aloqa qilish uchun vaqt xarajatlarini yiliga 15 kungacha kamaytiradi.
Kompleks ro‘yxatga olish bir vaqtning o‘zida yetti xizmatni taqdim etishni nazarda tutadi:
- Elektron raqamli imzoni rasmiylashtirish;
- Bank hisoblarini ochish va faollashtirish uchun ariza topshirish;
- Ayrim faoliyat turlari bo‘yicha litsenziya, ruxsatnoma yoki xabarnoma olish uchun so‘rov yuborish;
- Ko‘chmas mulkni ijaraga olish shartnomasini tuzish;
- QQS to‘lovchining guvohnomasini olish;
- Nazorat-kassa mashinalarini soliq organlarida ro‘yxatdan o‘tkazgan holda onlayn xarid qilish;
- Yuridik shaxs rahbarini tayinlash va uni «Yagona milliy mehnat tizimi» idoralararo tizimida hisobga qo‘yish.
Tadbirkor har bir xizmatdan o‘z xohishiga ko‘ra foydalanishi mumkin. Tanlangan pozitsiyalar uchun to‘lov yagona QR-kod orqali amalga oshiriladi.