Bojxona qo'mitasi raisi Akmalxo'ja Mavlonov boshchiligidagi O'zbekiston delegatsiyasi Abu-Dabida bo'lib o'tayotgan Jahon bojxona tashkilotining Texnologik konferensiyasi va ko'rgazmasida ishtirok etmoqda. Forum bojxona va xalqaro savdo faoliyatiga yondashuvni o'zgartirayotgan zamonaviy raqamli platformalar, intellektual tahliliy vositalar va avtomatlashtirilgan nazorat tizimlarini namoyish etayotgan yetakchi ekspertlar hamda kompaniyalarni jamladi.
Ko'rgazmada chegaralarni nazorat qilish va ta'minot zanjirlari xavfsizligini ta'minlash uchun yangi avlod texnikalari, shuningdek tashqi savdo jarayonlarini soddalashtiruvchi va tezlashtiruvchi yechimlar taqdim etilgan. O'zbekiston delegatsiyasi global raqamlashtirish fonida operatsiyalar samaradorligi va shaffofligini oshirish uchun milliy axborot tizimlarini xalqaro tizimlar bilan integratsiya qilish imkoniyatlarini faol o'rganmoqda.
Forum doirasida dunyoning eng yirik IT-kompaniyalari vakillari va boshqa mamlakatlar bojxona xizmatlari rahbarlari bilan uchrashuvlar o'tkazilmoqda. Ishtirokchilar ilg'or texnologiyalarni joriy etish tajribasi, raqamli platformalar sohasidagi hamkorlik va xalqaro tashuvlar tezligi hamda ishonchliligini oshirish strategiyalarini muhokama qilmoqda. O'zbekiston ushbu tajribadan o'z bojxona jarayonlarini modernizatsiya qilish va mamlakatning global savdo tarmog'idagi rolini kuchaytirish uchun foydalanishni maqsad qilgan.