Mamlakatda yoshi katta fuqarolarga firibgarlar qoʻngʻiroq qilib, goʻyoki pensiya yaqin orada oshirilishi bahonasi bilan shaxsiy maʼlumotlar va bank kartalari rekvizitlarini olishga urinayotgan holatlar koʻpaydi. Jinoyatchilar oʻzlarini banklar yoki Pensiya jamgʻarmasi xodimlari sifatida tanishtirib, maʼlumotlar berilmasa, pensiya qayta hisob-kitob qilinmasligini uqtirishmoqda.
Firibgarlar pasport maʼlumotlari, bank kartasi raqami, PINFL yoki SMSdagi kodni aytishni talab qilmoqda. Pensiya jamgʻarmasida taʼkidlashlaricha, ularning xodimlari hech qachon bunday maʼlumotlarni telefon orqali soʻramaydi va fuqarolarni jinoyatchilar nayranglariga aldanmaslikka chaqiradi.
Pensionerlar va ularning qarindoshlaridan hushyor boʻlish soʻralmoqda: begonalarga maxfiy maʼlumotlarni bermaslik va shubhali qoʻngʻiroqlar bo‘lsa, Pensiya jamgʻarmasining ishonch telefoni 1271 ga yoki 102 raqami orqali ichki ishlar organlariga murojaat qilish kerak.
