Oʻzbekiston prezidenti startaplarni qoʻllab-quvvatlashning toʻrt bosqichli ekotizimini yaratishni tasdiqladi — gʻoya tugʻilishidan eksport bozorlariga chiqishgacha. 11-fevraldagi qarorga koʻra, 2030-yilga kelib 5000 tagacha loyihani amalga oshirish va 2 milliard dollar venchur investitsiyalarini jalb qilish rejalashtirilgan. «Raqamli startaplar» dasturi ishtirokchilari IT Park rezidenti maqomini oladi, maktablarda esa startap gʻoyalari tanlovlari oʻtkaziladi.
Hujjatda ulkan maqsadlar koʻzda tutilgan: 500 ta startap 1 million dollardan ortiq, 100 tasi 10 million dollardan ortiq bahoga erishishi, 25 ta kompaniya esa 100 million dollardan oshishi kerak. Bundan tashqari, 20 mingdan ortiq ish oʻrni yaratish, 2000 ta yoshlar tashabbusini tijoratlashtirish va kamida 400 ta loyihani xalqaro bozorlarga olib chiqish rejalashtirilgan.
Ekotizim gʻoyani shakllantirish, ishlab chiqish, ishga tushirish va kengaytirish bosqichlarini oʻz ichiga oladi. Dasturni moliyalashtirishga 2026–2027-yillarda 160 million dollar va 130 milliard soʻm yoʻnaltiriladi. Hukumat kompleks yordam barqaror innovatsion muhitni shakllantirish va texnologik tadbirkorlikni rivojlantirishni jadallashtirish imkonini beradi, deb hisoblamoqda.