Humo to‘lov tizimi kartalari bo‘yicha SMS-xabarnomalar narxi o‘zgarishsiz qoladi. Avvalroq, 13131 raqamidan keladigan kiruvchi xabarning narxi 168,4 so‘mga ko‘tarilishi mumkinligi haqida xabar berilgan edi, biroq foydalanuvchilarning munosabatidan so‘ng bu qaror qayta ko‘rib chiqildi.
Octotelecom kontent-provayderi dastlab 2026-yil 1-maydan boshlab tarif oshirilishini e’lon qilgan edi, bu esa iste’molchilarning noroziligiga sabab bo‘ldi. Shundan so‘ng, Humo tizimi operatori bo‘lgan Banklararo milliy protsessing markazi xizmatning amaldagi narxini saqlab qolish bo‘yicha so‘rov yubordi.
Qo‘shimcha muhokamalar natijasida tomonlar bitta SMS uchun joriy tarifni 84,2 so‘m darajasida qoldirishga kelishib oldilar. Kompaniyada ta’kidlanishicha, qaror foydalanuvchilarning murojaatlari va xizmatning kundalik moliyaviy operatsiyalar uchun ahamiyati inobatga olingan holda qabul qilingan.