O'zbekiston Markaziy banki ma'lumotlariga ko'ra, 2026-yil 1-aprel holatiga tijorat banklari jami 69,72 million bank kartasi chiqargan. 2026-yilning birinchi choragida to'lov terminallari orqali amalga oshirilgan operatsiyalar aylanmasi 129,13 trillion so'mga yetdi. Mamlakatda 442,45 mingta to'lov terminali ishlamoqda, bankomatlar va infokiosklar soni esa 44,81 ming donadan oshdi.

Chiqarilgan kartalar soni bo'yicha Xalq banki yetakchilikni saqlab qolmoqda – 11,39 million dona. Ikkinchi o'rinda Agrobank 6,62 million karta bilan, uchinchi o'rinda Uzum Bank 6,35 million karta bilan joylashgan. Bankomatlar va infokiosklar soni bo'yicha ham Xalq banki birinchi o'rinda (3132 dona), undan keyin Agrobank va Kapitalbank turadi. To'lov terminallari segmentida Hamkorbank yetakchilik qilmoqda – 60 982 ta qurilma.

Yanvar-mart oylarida terminallar bo'yicha eng katta aylanmani Aloqabank ko'rsatdi – 16,45 trillion so'm. Ikkinchi o'rinda TBC Bank (9,96 trillion so'm), uchinchi o'rinda O'zbekiston Milliy banki (9,56 trillion so'm). TBC Bank o'zining terminal tarmog'i yo'qligiga qaramay, aylanma bo'yicha ikkinchi o'rinni egalladi.