O'zbekiston va Yaponiya sun'iy intellekt, raqamli transformatsiya va inson kapitalini rivojlantirish sohasida hamkorlikni kengaytirishni muhokama qildilar. Muzokaralar O'zbekiston Raqamli texnologiyalar vazirligi va JICA vakillari o'rtasida bo'lib o'tdi.
Uchrashuv davomida O'zbekiston tomoni "Raqamli O'zbekiston – 2030" strategiyasining asosiy yo'nalishlarini, jumladan, IT-xizmatlar eksportini 5 milliard dollargacha oshirish va texnologiyalar sohasida 300 minggacha mutaxassis tayyorlash rejalarini taqdim etdi. IT-sektorining o'sishi alohida qayd etildi: 2025 yilda eksport 1 milliard dollardan oshdi, IT Park Uzbekistan rezident kompaniyalari soni esa 4000 ga yaqinlashdi.
Shuningdek, sun'iy intellekt bo'yicha ta'lim dasturlarini rivojlantirish, jumladan, AI Leaders tashabbusi va minglab onlayn kurslarni o'zbek tiliga tarjima qilish masalalari muhokama qilindi. Asosiy loyihalardan biri Japan–Uzbekistan Digital AI Center markazini tashkil etish bo'lishi mumkin, u sun'iy intellekt, raqamli muhandislik va til texnologiyalari sohasida mutaxassislar tayyorlash bilan shug'ullanadi.