Xitoyning Tacheng shahrida qishloq joylarda yangi energiya manbalarida ishlaydigan transportni ommalashtirish dasturini ishga tushirish va sanoatni to'liq elektrlashtirish ekotizimini rivojlantirish bo'yicha konferensiyani birlashtirgan xalqaro forum bo'lib o'tdi. Tadbirda O'zbekiston delegatsiyasi ham ishtirok etdi.
Forumda respublikani "O'zeltexsanoat" uyushmasi mutaxassislari va ekspertlari taqdim etdilar. Ular turli mamlakatlarning davlat tuzilmalari, sanoat kompaniyalari va ilmiy tashkilotlari vakillari bilan birgalikda ekologik toza transportni rivojlantirishning asosiy tendensiyalarini muhokama qildilar.
Konferensiyaning markaziy mavzularidan biri elektromobil ishlab chiqarish va ekspluatatsiyasida sun'iy intellekt texnologiyalaridan foydalanish bo'ldi. Ishtirokchilar, shuningdek, qishloq joylarda zaryadlash infratuzilmasini yaratish, zaryadlash stansiyalari tarmog'ini kengaytirish va qayta tiklanadigan energiya manbalaridan foydalanishga yo'naltirilgan sanoat ekotizimlarini shakllantirish masalalarini ko'rib chiqdilar.
Bundan tashqari, ekspertlar elektromobillar, energiya saqlash tizimlari va transportni boshqarishning intellektual platformalarini ishlab chiqish sohasida tajriba almashdilar. Transport va energetika infratuzilmasi samaradorligini oshirishga qodir raqamli texnologiyalarga alohida e'tibor qaratildi.
Tashkilotchilarning ta'kidlashicha, forum barqaror rivojlanish, ekologik texnologiyalarni joriy etish hamda transport va sanoatni yanada elektrlashtirish istiqbollarini muhokama qilish uchun muhim xalqaro maydonlardan biri bo'ldi.