O‘zbekiston Markaziy banki 29-iyul kuni bo‘lib o‘tgan yig‘ilishda faqat bitta qaror variantini – asosiy stavkani yillik 14% darajasida saqlab qolishni ko‘rib chiqqanini ma’lum qildi. Pul-kredit siyosati departamenti direktori Samigjon Inogʻamovning tushuntirishicha, umumiy inflyatsiyaning sekinlashishi va yil boshidan buyon inflyatsion kutilmalarning pasayishiga qaramay, uni pasaytirish masalasi muhokamaga ham kiritilmagan.
MB vakilining so‘zlariga ko‘ra, iqtisodiyotda sezilarli proinflyatsion xatarlar saqlanib qolmoqda. Yuqori iqtisodiy faollik va ijobiy ishlab chiqarish farqi qattiq pul-kredit siyosatini saqlab qolishni talab qiladi. Regulyator siyosatni yumshatishning asosiy shartlaridan biri sifatida hozirda 5,7% ni tashkil etuvchi bazaviy inflyatsiyaning barqaror pasayishini, shuningdek, aholi va biznesning inflyatsion kutilmalarining yanada kamayishini ko‘rsatmoqda.
Markaziy bank, shuningdek, 2028-yilning ikkinchi choragidan boshlab inflyatsiyaning biroz tezlashishi mumkinligi haqida ogohlantirdi. Sabablar orasida iyun oyida energiya resurslari tariflarining oshishi va ishlab chiqarish hamda transport xarajatlarining ehtimoliy o‘sishi qayd etilgan. Shu bilan birga, regulyator milliy valyutaning maqsadli kursini belgilamasligini va 2017-yildan buyon mamlakatda amal qilayotgan erkin ayirboshlash kursi shakllanishi rejimiga rioya qilishda davom etishini ta’kidladi.