iSON Xperiences kompaniyasi O‘zbekistonni biznes jarayonlari autsorsingi (BPO) sohasida ofshor mijozlarga xizmat ko‘rsatish markazini ishga tushirish uchun ko‘rib chiqmoqda. Birinchi bosqichda loyiha rus tilini biladigan mutaxassislar uchun 100 ga yaqin ish o‘rni yaratishni nazarda tutadi.
Markazni ochish istiqbollari O‘zbekiston raqamli texnologiyalar vaziri Sherzod Shermatov va iSON Xperiences bosh operatsion direktori Rami Sweis o‘rtasida Global Business Services Forum 2026 doirasida muhokama qilindi. Kelajakda kompaniya jamoani kengaytirishni va ingliz, nemis, turk va boshqa tillarda mijozlar bilan ishlash uchun mutaxassislarni jalb qilishni rejalashtirmoqda.
iSON Xperiences 2011-yilda tashkil etilgan bo‘lib, mijozlarga xizmat ko‘rsatish va BPO-xizmatlariga ixtisoslashgan. Hozirda kompaniya 19 mamlakatda 18 mingdan ortiq xodimni birlashtiradi, 40 dan ortiq operatsion markazlarni boshqaradi va har oyda xalqaro brendlarning 50 milliondan ortiq mijoz murojaatlarini qayta ishlaydi. IT Park Uzbekistan ma’lumotlariga ko‘ra, loyiha investitsiyalarni jalb qilishi, yangi malakali ish o‘rinlari yaratishi va mamlakatning global raqamli xizmatlar bozoridagi mavqeini mustahkamlashi mumkin.