Jizzax viloyatidagi integratsiyalashgan AES loyihasining umumiy qiymati 9,5 milliard dollarga baholanmoqda. Bu summaning qariyb 1,9 milliard dollari, ya'ni 21 foizi mahalliy mahsulot va uskunalarga to'g'ri keladi. Biroq, Shavkat Mirziyoyev mahalliylashtirish darajasini kamida 30 foizga oshirishni, qurilish-montaj ishlarida milliy korxonalar ulushini 65 foizga yetkazishni va loyihaga 7 mingga yaqin mahalliy mutaxassislarni jalb qilishni topshirdi.

Qurilishning faol bosqichi 4-iyun kuni boshlandi. Hozirgi kunga qadar reaktor uchun chuqur qazish ishlari yakunlandi – 1 million kubometrdan ortiq tuproq olib tashlandi va poydevor plitasiga 916 kubometr beton quyildi. Maydonda 450 kishi va 100 dan ortiq texnika ishlamoqda. Stansiya uchun 3 mingga yaqin turdagi mahsulot va uskunalar talab qilinadi. Ishlab chiqarishni kengaytirish maqsadida Forish tumanida 200 gektar maydonda sanoat zonasi tashkil etish rejalashtirilgan bo'lib, u yerda kamida 100 ta qo'shma korxona joylashtirilishi ko'zda tutilgan.

AESdan tashqari, loyiha keng ko'lamli infratuzilma qurilishini ham nazarda tutadi: 388 km elektr tarmoqlari, 110 kV podstansiya, 21 km ichimlik suvi va 120 km texnik suv quvurlari, shuningdek, 39,5 km avtomobil yo'llari va 11 km temir yo'llar. Shu bilan birga, 200 gektar maydonda qariyb 33 ming aholi uchun 10 mingga yaqin kvartirali atomchilar shaharchasi paydo bo'ladi. Bu yerda maktablar, bolalar bog'chalari, tibbiyot va sport ob'ektlari, shuningdek, dam olish zonalari quriladi. Hukumat infratuzilma ob'ektlari uchun 60-70% mahalliy mahsulot va xizmatlarni ta'minlashni va shu bilan birga kelajakdagi stansiya uchun mutaxassislarni tayyorlashni rejalashtirmoqda.