Xorazm viloyatida Urganch aeroportini Urganch temir yoʻl vokzali orqali Xiva bilan toʻgʻridan-toʻgʻri bogʻlaydigan elektropoyezd qatnovi yoʻlga qoʻyildi. Marshrutda CRRC Dalian tomonidan ishlab chiqarilgan Xitoyning CR200J poyezdi harakatlanadi. Olti vagonli tarkib 415 yoʻlovchiga moʻljallangan, konditsionerlar bilan jihozlangan va maksimal tezligi 160 km/soatga yetadi. Aeroport va Xiva oʻrtasidagi masofa 45,9 km boʻlib, poyezd uni 47 daqiqada bosib oʻtadi.
Ertalabki poyezd aeroportdan soat 8:40 da joʻnab, Urganch vokzaliga 8:59 da yetib keladi, uch daqiqadan soʻng Xivaga qarab harakatlanishni davom ettiradi va u yerga 9:22 da yetib boradi. Kechqurun poyezd Xivadan 21:00 da joʻnab, Urganch aeroportiga 21:42 da yetib keladi. Katta yoshlilar uchun chipta narxi 25 ming soʻm, bolalar uchun esa 14 ming soʻm.
Qiymati 225 milliard soʻm boʻlgan loyiha Oʻzbekistonda temir yoʻl liniyasi toʻgʻridan-toʻgʻri aeroportga olib borilgan birinchi holat boʻldi. Yangi marshrut sayyohlar va aholining Urganch aeroporti, shahar va Xiva oʻrtasidagi sayohatlarini soddalashtirishi kerak. Shu bilan birga, Urganch va Xiva oʻrtasida trolleybus harakatlanishda davom etmoqda, yaqinda bu yerda mamlakatdagi birinchi pullik avtomobil yoʻli ham ochildi.