"O'zbekneftgaz" yangi quduqlarni ishga tushirish hisobiga tabiiy gaz qazib olishni kuniga 3,9 mln m³ ga oshirishni rejalashtirmoqda. Tegishli topshiriq kompaniya boshqaruvi raisi Abdug'ani Sanginov tomonidan berildi. Yana 460 ming m³ gaz 16 ta quduqni kapital ta'mirlashdan so'ng olinishi kutilmoqda. Vazifalar to'qqiz oylik davr tugashiga qadar bajarilishi kerak, yig'ilish vaqtida bu muddatga 24 kun qolgan edi.
Rahbariyatga sentabr oyiga rejalashtirilgan quduqlarni ishga tushirishni tezlashtirish, shuningdek, har bir kon va ob'ektning ish samaradorligini tahlil qilish topshirildi. Kompaniya o'tgan yilga nisbatan qazib olish sur'atlarini barqarorlashtirish va mavjud zaxiralardan samaraliroq foydalanish niyatida. Shu bilan birga, tizim korxonalari gaz kondensati, oltingugurt va suyultirilgan gaz ishlab chiqarishni oshirishi kerak – yil yakuniga ko'ra belgilangan rejadan 120% ga erishish maqsadi qo'yilgan.
Yig'ilishda kuz-qish mavsumiga tayyorgarlik, avariya holatlarini oldini olish, investitsiya loyihalari va raqamlashtirish masalalari ham muhokama qilindi. Xususan, siquv kompressor stansiyalari 1-oktabrgacha to'liq ishga tayyor bo'lishi kerak. Bundan tashqari, "O'zbekneftgaz" "E-Kon", "Burg'ulash markazi", ERP va BI tizimlarini joriy etish hamda neft bazalarini raqamlashtirishni yakunlash muddatlarini belgiladi.