IT Park Uzbekistan va Korea ICT Entrepreneurs Association texnologik hamkorlikni kengaytirish va startaplarni qo‘llab-quvvatlashning yangi mexanizmlarini muhokama qildilar. Muzokaralar ICT WEEK Uzbekistan 2026 doirasida bo‘lib o‘tdi. Tomonlar akseleratsiya va inkubatsiya dasturlarini rivojlantirish, shuningdek, texnologik kompaniyalar uchun ikki mamlakat bozorlariga chiqish imkoniyatlarini ko‘rib chiqdilar.
Korea ICT Entrepreneurs Association Chungcheongnam-do provinsiyasida o‘zbek startaplari uchun akseleratsiya va inkubatsiya dasturini tashkil etishga tayyor. Ishtirokchilar Koreya bozorining o‘ziga xos xususiyatlarini o‘rganishlari, mahalliy kompaniyalar bilan tanishishlari va potentsial hamkorlar bilan aloqalar o‘rnatishlari mumkin bo‘ladi.
O‘z navbatida, IT Park Uzbekistan 2027-yilga mo‘ljallangan Land of Startups dasturini taqdim etdi va Koreya startaplarini, shu jumladan Chungcheongnam-do jamoalarini ishtirok etishga taklif qildi. Shuningdek, tomonlar K-ICT tarmog‘idagi kompaniyalarni O‘zbekistonga jalb qilish, ishbilarmonlik uchrashuvlari va biznes missiyalarini o‘tkazish imkoniyatini muhokama qildilar.
Qo‘shma pilot loyihalar va yangi bozorlarga chiqishda ikki tomonlama qo‘llab-quvvatlashga alohida e’tibor qaratildi. Korea ICT Entrepreneurs Association 400 ga yaqin ICT-kompaniyani birlashtiradi va texnologik hamkorlik, ishbilarmonlik tadbirlari va xalqaro biznes missiyalari bilan shug‘ullanadi.
