2027-yil 1-yanvardan O'zbekistonda elektr energiyasining ulgurji va chakana bozoriga o'tishning birinchi bosqichi boshlanadi. Yirik korxonalar mustaqil xususiy ishlab chiqaruvchilardan elektr energiyasini to'g'ridan-to'g'ri, tomonlar shartnomada belgilaydigan narxlarda sotib olishlari mumkin bo'ladi. Shu bilan birga, kichik va mikroelektr stansiyalar o'z hududlaridagi korxonalarga ishlab chiqarilgan elektr energiyasini sotish imkoniyatiga ega bo'ladilar.
Yangi qoidalar Vazirlar Mahkamasining 2026-yil 30-sentyabrdagi 527-sonli qarori bilan tasdiqlangan. Ulgurji bozorda ikki tomonlama shartnomalar tuzish huquqini litsenziya asosida ishlaydigan va elektr energiyasini uzoq muddatli kafolatli sotib olish bo'yicha kelishuvlarga ega bo'lmagan mustaqil ishlab chiqaruvchilar, shuningdek, yirik iste'molchilar oladi. Oxirgilarga 6 kVt dan yuqori kuchlanishli tarmoqlarga ulangan va yiliga kamida 10 million kVt·soat iste'mol qiladigan korxonalar kiradi. Byudjet va kommunal tashkilotlar, suv ta'minoti ob'ektlari va nasos stansiyalari, fermer xo'jaliklari va mobil aloqa operatorlari bu toifaga kirmaydi.
Chakana bozorda quvvati 5 MVt gacha bo'lgan elektr stansiyalari o'sha mintaqadagi – Qoraqalpog'iston, viloyat yoki Toshkentdagi taqsimlovchi operator tarmoqlariga ulangan iste'molchilarga energiya sotishi mumkin. Narx ham shartnoma shartlari bilan belgilanadi. Maishiy iste'molchilar bunday sxemada ishtirok eta olmaydilar.
