Yangi Toshkentda 12-oktabr kuni umumiy qiymati 1 milliard dollar bo'lgan yettita ob'ektning ochilish marosimi va yana 2,5 milliard dollarlik o'nta loyihaning qurilishi boshlandi. Tadbirda O'zbekiston Prezidenti Shavkat Mirziyoyev ishtirok etdi. Shaharsozlik loyihasi uch yilga yaqin vaqtdan beri amalga oshirilmoqda. Birinchi bosqichda 50 milliard dollar miqdorida investitsiyalar, 2 ming gektar yashil hududlar va 500 gektar parklar yaratish, shuningdek, 150 million kvadrat metr turar-joy va tijorat binolari qurish ko'zda tutilgan. Hozirgi kunga qadar bajarilgan ishlar hajmi 2 milliard dollarga yetdi.

Foydalanishga topshirilgan ob'ektlar orasida taxminan 7 ming xonadonli “Sharq bahori” turar-joy majmuasining birinchi bosqichi, “Yangi Toshkent” podstansiyasi, trigeneratsiya stansiyasi, Savdo-sanoat palatasi binosi, “Sohil bog'i” parki va 2 ming o'quvchiga mo'ljallangan maktab bor. Turkiyaning MIMSAN kompaniyasi ishtirokida 73 million dollarga qurilgan energetika stansiyasi 100 ming xonadonni isitish va sovutishni ta'minlaydi hamda elektr energiyasi ishlab chiqaradi. Xitoyning Haocheng Industry Group Limited kompaniyasi bilan hamkorlikda qurilgan podstansiya va yuqori voltli liniyalarga 95 million dollar yo'naltirildi. Shuningdek, 18 km yo'llar, 13 km kanalizatsiya tarmoqlari va 4,5 km suv quvurlari yotqizildi.

Yangi tashabbuslar orasida yuqori texnologiyali ishlab chiqarish va yarimo'tkazgichlarga ixtisoslashgan Deep Tech Park ham bor. Uni yaratish uchun 320 million dollar ajratilgan, hududdagi kelajakdagi loyihalarning umumiy qiymati 1,7 milliard dollarga yetishi mumkin. Finlyandiyaning MariMatic kompaniyasi bilan hamkorlikda elektr energiyasi ishlab chiqarish bilan chiqindilarni yig'ish tizimini joriy etish rejalashtirilgan. Bundan tashqari, ko'p qavatli uylarning tomlariga umumiy quvvati 20 MVt bo'lgan quyosh panellari o'rnatiladi.