Yuridik AI-platformasi Lawformer ishlab chiquvchisi TBC Uzbekistan bilan shartnomalarni boshqarishni avtomatlashtirish boʻyicha hamkorlik shartnomasini tuzdi. Yechim bevosita Microsoft Word’ga integratsiyalanadi va hujjatlarni tayyorlash, ularning mazmunini tekshirish hamda kompaniyaning boshqa boʻlinmalari bilan oʻzaro aloqada boʻlishga yordam beradi. Joriy etish odatiy ish jarayonlarini oʻzgartirishga hojat qoldirmasdan, biznes kengayishi bilan yuridik jamoaning kundalik ish yukini kamaytirishga qaratilgan.

Platforma mintaqa mamlakatlarida qonunchilik va uni qoʻllash amaliyotini hisobga olish uchun ochiq milliy huquqiy bazalarga ulanadi. Qoʻllab-quvvatlanadigan tillar orasida oʻzbek va rus tillari mavjud. Lawformer uchun TBC Uzbekistan bilan hamkorlik kompaniyaning Markaziy va Sharqiy Yevropa bozorlari bilan bir qatorda koʻrib chiqayotgan Markaziy Osiyoda rivojlanish strategiyasining bir qismi boʻldi. TBC’da taʼkidlashlaricha, ushbu vositadan foydalanish yuridik vazifalar hajmining oʻsishi fonida shartnomaviy ishlarni optimallashtirish imkonini beradi.

Mintaqaviy kengayish doirasida Lawformer Yevropa Huquqiy Texnologiyalar Assotsiatsiyasi (ELTA) bilan birgalikda Legal Tech Meetup 2026 konferensiyasini oʻtkazadi. Tadbir 21–22-noyabr kunlari Tbilisi shahrida boʻlib oʻtishi rejalashtirilgan va 25 dan ortiq mamlakatdan korporativ huquqshunoslar, yuridik firmalar va texnologik kompaniyalar vakillarini birlashtiradi. Dasturda TBC Bank yuridik departamenti rahbari Saidazim Saidkamalovning nutqi ham eʼlon qilingan.