IT Park Uzbekistan 4-noyabr kuni AQSh Milliy manfaatlar markazi (CFTNI) va Jons Xopkins universiteti Ilg'or xalqaro tadqiqotlar maktabi (JHU SAIS) vakillari bilan muzokaralar o'tkazdi. AQSh delegatsiyasiga CFTNI katta eksperti va universitet professori Endryu Kachins boshchilik qildi. O'zbekiston tomonidan uchrashuvda IT Park strategik rivojlanish bo'yicha direktori Mahliyo Muksinova ishtirok etdi.
Ishtirokchilarga mahalliy IT-sohasining imkoniyatlari, kadrlar salohiyati, soliq imtiyozlari hamda texnologik kompaniyalarni davlat tomonidan qo'llab-quvvatlash mexanizmlari taqdim etildi. Raqamli xizmatlar eksporti, xorijiy dasturchilarni jalb qilish va startaplarni rivojlantirish istiqbollari alohida ko'rib chiqildi. Shuningdek, AQSh delegatsiyasiga mahalliy va xorijiy biznes uchun maxsus soliq va regulyator shartlariga ega maxsus huquqiy rejimni nazarda tutuvchi Enterprise Uzbekistan loyihasi taqdim etildi.
Muzokaralar AQSh tahliliy markazlari va sohaviy tashkilotlari bilan hamkorlik masalalarini qamrab oldi. Xususan, O'zbekistonning texnologik rivojlanishi haqida ekspert nashrlarini tayyorlash va AQShda mamlakatning investitsiya imkoniyatlari to'g'risidagi ma'lumotlarni tarqatish muhokama qilindi. Uchrashuv yakunlari bo'yicha tomonlar tahliliy materiallar hamda amalga oshirilayotgan islohotlar baholari bilan almashishni davom ettirishga kelishib oldilar.