O‘zbekiston Atom energiyasi agentligi (O‘zatom) direktori Azim Axmedxadjayev 6-noyabr kuni Jizzax viloyatining Forish tumani Bog‘don shaharchasi aholisi bilan uchrashuv o‘tkazdi. Aralash shaklda tashkil etilgan tadbirda 500 ga yaqin kishi ishtirok etdi. Asosiy masalalar bo‘lajak AES obyektlarida ishga joylashish, kasbiy ta’lim hamda stansiya qurilishi va undan foydalanish uchun mutaxassislarni tayyorlash bo‘ldi.
Aholi amaliyot o‘tash, sohaviy ma’lumot olish va o‘rta bo‘g‘in kadrlarini tayyorlash dasturlari bo‘yicha ta’lim olish imkoniyatlariga qiziqish bildirdi. O‘zatom rahbari tumanda ixtisoslashtirilgan sanoat zonasi va atom shaharchasini barpo etish rejalari haqida ma’lum qildi. Bundan tashqari, kelgusi yildan boshlab mutaxassislarni kasbiy tayyorlash dasturlarini yo‘lga qo‘yish ko‘zda tutilgan. Loyiha uchun xodimlarni qabul qilishda ustuvorlik mahalliy aholiga berilishi rejalashtirilmoqda.
Uchrashuv yakunlari bo‘yicha fuqarolarning murojaatlari keyinchalik ko‘rib chiqish va nazorat qilish uchun qayd etildi. Muhokamada, shuningdek, tuman hokimligi, O‘zatomning sohaviy bo‘linmalari, qurilish tashkilotlari va ta’lim muassasalari vakillari ham ishtirok etdi. Agentlik aholi bilan uchrashuvlarni davom ettirish hamda fuqarolarni atom loyihasining amalga oshirilishi jarayoni va ishga joylashish imkoniyatlari haqida xabardor qilib borish niyatida.