Yandex Uzbekistan O‘zbekistonda Market Yandex Go faoliyati to‘xtatilishini e'lon qildi. Xaridorlar yetkazib berish muddati uzoqroq bo‘lgan tovarlarni buyurtma qilgan vitrina 10-noyabrgacha faoliyat yuritadi. Shundan so‘ng kompaniya Lavka va "Do‘konlar" servislari orqali oziq-ovqat, elektronika, kosmetika va boshqa tovarlarni ekspress yetkazib berishni rivojlantirishga e'tibor qaratadi. Ular orqali buyurtmalarni qabul qilish o‘rtacha 15 daqiqadan boshlanadi. Kompaniya platforma yopilishiga qadar rasmiylashtirilgan barcha xaridlarni yetkazib berishga va'da beradi.
Biznesning qayta shakllantirilishi tez yetkazib berishga bo‘lgan talabning ortishi bilan bog‘liq: Yandex ma'lumotlariga ko‘ra, Lavka va "Do‘konlar" orqali buyurtmalar soni 2025-yilga nisbatan uch baravarga oshdi. 2024-yil kuzida O‘zbekistonda ishga tushirilganidan buyon Lavka o‘nta darkstorgacha kengaydi va o‘z savdo belgilari ostida 100 dan ortiq tovarlarni taklif qilmoqda. "Do‘konlar" servisining hamkorlari soni esa deyarli ikki baravarga ko‘payib, 500 taga yetdi.
Market Yandex Go o‘z faoliyatini 2025-yilning aprel oyida boshlagan bo‘lib, dastlab Toshkent va Toshkent viloyatining bir qismiga xizmat ko‘rsatgan. Keyinchalik geografiya mamlakatning to‘qqizta viloyatigacha kengaydi. Marketpleysni ishga tushirish uchun kompaniya Toshkent viloyatining Zangiota tumanida 9000 m² maydonga ega ombor qurdi. Hamkorlikni davom ettirishdan manfaatdor bo‘lgan hamkorlarga Yandex ekspress yetkazib berish platformalariga o‘tishni taklif qilmoqda.