O‘zbekiston va Ozarbayjon raqamli davlat boshqaruvi, sun’iy intellektni joriy etish hamda texnologik biznesni rivojlantirish sohasidagi hamkorlikning yangi yo‘nalishlarini ko‘rib chiqmoqda. Ushbu masalalarni Bokuda O‘zbekiston raqamli texnologiyalar vazirining birinchi o‘rinbosari Ayubxon Sultonov va Ozarbayjon raqamli rivojlanish va transport vaziri o‘rinbosari Rashad Gasanov muhokama qildilar. Muzokaralar BMTning davlat boshqaruvida innovatsiyalar bo‘yicha sammiti doirasida bo‘lib o‘tdi.
Uchrashuv mavzularidan biri tajriba almashish va myGov platformasidan foydalangan holda qo‘shma loyihalarni tayyorlash bo‘ldi. Ishtirokchilar, shuningdek, davlat xizmatlariga SI-agentlarini joriy etish hamda nutqni matnga aylantirish texnologiyalarini qo‘llashni ko‘rib chiqdilar. Muzokaralarning alohida qismi ikki davlat IT-parklarining o‘zaro hamkorligi, startaplarni qo‘llab-quvvatlash va texnologik kompaniyalarning qo‘shni mamlakat bozorlariga chiqishi uchun sharoit yaratishga qaratildi.
Bundan tashqari, Sultonov davlat boshqaruvida innovatsiyalarning amaliy qo‘llanilishi bo‘yicha munozarada ishtirok etdi. U Gretsiya, Dominika Respublikasi, Seyshel Orollari va Qora dengiz iqtisodiy hamkorlik tashkiloti vakillari bilan birgalikda yangi yechimlarni muvaffaqiyatli joriy etish omillarini muhokama qildi. Ular qatorida raqamli loyihalarni moslashtirish va ko‘lamini kengaytirish imkonini beruvchi samarali rahbarlik, institutsional mexanizmlar va xalqaro sheriklik qayd etildi.