Britaniyaning British American Tobacco (BAT) kompaniyasining 1994-yildan buyon O‘zbekiston iqtisodiyotiga kiritgan jami investitsiyalari $530 mlndan oshdi. Kompaniya biznesni kengaytirishni davom ettirish va mahalliy hamkorlar bilan birgalikda yangi investitsiya loyihalarini ishlab chiqish niyatida. Bu haqda BAT bosh korporativ direktori Kingsli Uiton O‘zbekiston elchisi Ravshan Usmonov bilan uchrashuvda ma’lum qildi.
2021-yildan buyon BATning O‘zbekistondagi bo‘linmasi mintaqaviy eksport markazi sifatida faoliyat yuritmoqda. 2025-yilda xomashyo va tayyor mahsulotlarning xorijga yetkazib berilishi $95 mln keltirdi. Kompaniya 1000 dan ortiq xodimga ega va mamlakatning eng yirik soliq to‘lovchilari qatoriga kiradi. O‘tgan yili u budjetga 3,2 trln so‘m o‘tkazdi. Shuningdek, 2025-yilda korxona to‘liq xususiylashtirilgani xabar qilinmoqda.
Muzokaralar davomida tomonlar kelgusidagi investitsiyaviy hamkorlikni, shuningdek, voyaga yetmaganlarning nikotin mahsulotlaridan foydalanishini oldini olish va ushbu sohada innovatsion yechimlarni joriy etishni muhokama qildilar. British American Tobacco 1902-yilda tashkil etilgan bo‘lib, uning bosh qarorgohi Londonda joylashgan. Kompaniya 170 dan ortiq mamlakatda faoliyat yuritadi, 2025-yil yakunlari bo‘yicha uning tushumi $34 mlrdni tashkil etdi.