O‘zbekiston Prezidenti Shavkat Mirziyoyev Toshkent viloyatining Yuqori Chirchiq tumanidagi NURA Electric zavodiga tashrif buyurib, uning ishlab chiqarish imkoniyatlari bilan tanishdi. Korxonaga $50 mln investitsiya kiritilib, 20 gektar maydonda 1000 dan ortiq ish o‘rni yaratildi. Zavod 1500 dan ziyod turdagi elektrotexnika mahsulotlarini ishlab chiqaradi, uning yillik ishlab chiqarish quvvati esa 25 ming donadan ortiq uskunani tashkil etadi.
NURA Electric korxonasining asosiy ixtisoslashuvi — yuqori va past kuchlanishli uskunalar. Assortimentga 0,4–500 kV li taqsimlash qurilmalari, podstansiyalar, qayta tiklanuvchi energetika obyektlari uchun avtomatlashtirish tizimlari, elektr shinalari va metall konstruksiyalar kiradi. Korxonada 120 dan ortiq uskunalar birligi, jumladan, Yaponiyaning Amada hamda Turkiyaning Durma va Teslabend ishlab chiqaruvchilarining dasturiy boshqaruvga ega dastgohlari va presslari o‘rnatilgan.
O‘zbekiston Prezidenti NURA Electric zavodiga tashrif buyurdi / Foto: Matbuot
Ishlab chiqarish va ma'muriy jarayonlarni boshqarish yagona SAP ERP raqamli platformasi orqali amalga oshiriladi. Uskunalar va butlovchi qismlar ishlab chiqarilishini mahalliylashtirish tufayli mahsulot tannarxini 10% gacha pasaytirishga erishildi. Zavodda akkreditatsiyadan o‘tgan sinov laboratoriyasi ham faoliyat yuritmoqda, ishlab chiqarish esa xalqaro ISO standartlariga muvofiq tashkil etilgan. Korxona to‘liq sikldagi yig‘uv, sinovdan o‘tkazish va kechayu kunduz servis xizmatini ko‘rsatish imkoniyatlariga ega.