Nurafshon shahrida robototexnika, elektronika va yuqori texnologiyali uskunalar ishlab chiqarishni rivojlantirishga qaratilgan "Kelajak texnologiyalari markazi" tashkil etiladi. Rezident korxonalar IT Park darajasidagi soliq va bojxona imtiyozlariga ega bo'ladi. Loyiha haqida prezident Shavkat Mirziyoyev elektrotexnika tarmog'i vakillari, tadbirkorlar va investorlar bilan uchrashuvda ma'lum qildi.
So'nggi o'n yilda O'zbekiston elektrotexnika sanoatiga $2 mlrd investitsiya kiritildi, 413 ta ishlab chiqarish obyekti barpo etildi va 100 dan ortiq yangi turdagi mahsulot ishlab chiqarish o'zlashtirildi. 2026-yilda ishlab chiqarish hajmi 2016-yildagi 1,7 trln so'mga nisbatan 50 trln so'mga yetdi, eksport $1,6 mlrdni, investitsiyalar esa $600 mlnni tashkil etdi. Yangi markaz uskunalar, sanoat robotlari va elektron komponentlar ishlab chiqaruvchilarini birlashtirishi lozim. Ushbu maqsadlar uchun import qilinadigan xomashyo va butlovchi qismlar bojxona bojlaridan, ilmiy ishlanmalardan olinadigan daromadlar esa soliqlardan ozod qilinadi.
Alohida yo'nalish xomashyo bazasini kengaytirish bo'ladi: uchinchi mis boyitish fabrikasi ishga tushirilgach, mis ishlab chiqarish 300 ming tonna darajasida kutilmoqda, 2030-yilga borib esa 500 ming tonnagacha o'sishi kerak. Bundan tashqari, hukumat ilmiy tashkilotlar va sanoat korxonalarini bog'laydigan "Yangi sanoat" milliy platformasini yaratish niyatida. Soha rivojiga, shuningdek, yaqin o'n yilga rejalashtirilgan, umumiy qiymati $450 mlrd bo'lgan energetika va qurilish loyihalari ham hissa qo'shishi lozim.