O'zbekiston 12–13-noyabr kunlari Turkiyaning Antaliya shahrida bo'lib o'tgan World Atomic Days xalqaro forumida atom sohasini rivojlantirish bo'yicha milliy tajribasini taqdim etdi. Tadbir davlat idoralari, atom korporatsiyalari, xalqaro tashkilotlar va yoshlar tashabbuslari vakillarini birlashtirdi. Forum BRICS davlatlarining atom energiyasi bo'yicha platformasi, MAGATE va Butunjahon yadro assotsiatsiyasi ko'magida "Rosatom" tomonidan tashkil etildi.
"Odamlar va sayyora uchun atom energetikasi" yalpi majlisida "O'zatom" agentligi direktori Azim Axmedxadjayev ishtirok etdi. U "Rosatom", Butunjahon yadro assotsiatsiyasi, Qozog'iston atom idorasi va boshqa tashkilotlar rahbarlari bilan birgalikda elektr energiyasiga ortib borayotgan talabni ta'minlash, energetika xavfsizligini mustahkamlash hamda iqlimiy maqsadlarga erishishda atom energetikasining o'rnini muhokama qildi. Xalqaro hamkorlik, yangi texnologiyalar va mutaxassislarni tayyorlash alohida mavzularga aylandi.
Mamlakatda birinchi integratsiyalashgan atom elektr stansiyasini qurish loyihasini amalga oshirayotgan O'zbekiston uchun ushbu forum alohida ahamiyatga ega. Respublikada atom energetikasining rivojlanishi uzoq muddatli energiya xavfsizligini ta'minlash, sanoat o'sishini qo'llab-quvvatlash va iqtisodiyotning texnologik imkoniyatlarini kengaytirishga yordam beradi deb kutilmoqda. Tadbirda mamlakat nomidan Impact Team 2050 xalqaro yoshlar tashabbusi ishtirokchilari ham qatnashdi.