Ўзбекистон Президенти Шавкат Мирзиёев 17 декабрь куни Корея Республикаси Миллий ассамблеясининг спикери У Вон Шик бошчилигидаги Корея Республикаси ва Марказий Осиё давлатлари парламентлари раҳбарларининг учинчи йиғилишида иштирок этиш учун мамлакатга ташриф буюрган делегациясини қабул қилди. Учрашув аввалида кореялик томон давлат раҳбарига президент Ли Чжэ Мённинг саломи ва тилакларини етказди.
Музокаралар чоғида томонлар алоҳида стратегик шериклик муносабатларини, жумладан, парламентлараро йўналишда янада ривожлантириш масалаларини муҳокама қилдилар. Сиёсий мулоқотнинг фаол ривожланаётгани, парламентлараро алоқаларнинг ўсаётгани, шунингдек, Ўзбекистон иқтисодиётини модернизация қилиш ва юқори технологияли ишлаб чиқаришларни яратишга қаратилган ўзаро савдо ва Корея инвестицияларининг кўпайиши қайд этилди.
Гуманитар ва таълим соҳасидаги ҳамкорликка алоҳида эътибор қаратилди: Ўзбекистонда Кореянинг етакчи университетларининг тўртта филиали ва ҳудудларда касб-ҳунар таълими марказлари фаолият юритмоқда. Томонлар инфратузилма, транспорт ва логистика, нодир металларни қайта ишлаш ва муҳим хом ашё, шунингдек, қонун ижодкорлиги фаолиятини рақамлаштириш соҳаларида қўшма лойиҳаларни амалга оширишни қўллаб-қувватладилар, парламентлараро ҳамкорлик дастурини тайёрлаш ва дўстлик парламент гуруҳлари фаолиятини жадаллаштириш муҳимлигини таъкидладилар.