2026-yil 3-aprel kuni O'zbekiston Bosh vazirining o'rinbosari – iqtisodiyot va moliya vaziri Jamshid Quchqorov Malayziyaning MIMOS Holding Sdn Bhd ilmiy-tadqiqot kompaniyasi bosh direktori Razman Jaafr bilan uchrashuv o'tkazdi. Muhokamalarda kompaniyalar rahbarlari, vazirlik vakillari va "O'zeltexsanoat" uyushmasi ishtirok etdi.
Tomonlar elektronika, elektrotexnika va yarimo'tkazgich sanoati sohasida hamkorlikni kengaytirishni muhokama qildilar. Ilg'or texnologiyalarni joriy etish, innovatsion ekotizimni yaratish va yuqori malakali mutaxassislarni tayyorlashga alohida e'tibor qaratildi. Milliy kadrlar bazasini shakllantirish uchun mikrosxemalarni ishlab chiqish (IC-dizayn) bo'yicha o'qitish va maxsus treninglar tashkil etish bo'yicha chora-tadbirlar kelishib olindi.
MIMOS O'zbekistonda hamkorlikni kengaytirish va zamonaviy texnologiyalarni joriy etishga tayyorligini bildirdi. Uchrashuv yakunida tomonlar yuqori texnologiyalarni rivojlantirish va mamlakatda yarimo'tkazgich sanoatini mustahkamlashga qaratilgan istiqbolli loyihalarni amalga oshirish, tajriba almashish va birgalikda ishlashni davom ettirishga kelishib oldilar.