O‘zbekiston Raqamli texnologiyalar vaziri Sherzod Shermatov Telecontact asoschisi Viktor Volskiy bilan uchrashuv o‘tkazdi. Tomonlar biznes-jarayonlar autsorsingi (BPO) sohasida hamkorlikni yanada rivojlantirish, kompaniyaning mamlakatdagi faoliyatini kengaytirish va xorijiy bozorlarga raqamli xizmatlar eksportini oshirish masalalarini muhokama qildilar.
Muzokaralarning asosiy mavzularidan biri xalqaro mijozlarga xizmat ko‘rsatish uchun O‘zbekiston aloqa markazlarining salohiyatidan foydalanish bo‘ldi. Kompaniya vakillari mahalliy mutaxassislarning yuqori darajadagi tayyorgarligini ta’kidlab, hududlarda yangi ofislar ochishga qiziqish bildirdilar. Shuningdek, qo‘shimcha ish o‘rinlari yaratish va ko‘rsatilayotgan xizmatlar spektrini kengaytirish istiqbollari muhokama qilindi.
O‘zbekiston tomoni xorijiy investorlarga maxsus soliq, huquqiy va infratuzilma sharoitlarini taklif etuvchi Enterprise Uzbekistan Xalqaro raqamli texnologiyalar markazining imkoniyatlarini taqdim etdi. Kompaniya biznesni yanada rivojlantirish uchun ushbu mexanizmlarga qiziqish bildirdi. Uchrashuv yakunida tomonlar yangi loyihalar ustida birgalikda ishlashni davom ettirishga kelishib oldilar. Bugungi kunda Telecontact Farg‘ona va Samarqandda faoliyat yuritmoqda, shuningdek, 24–25-iyul kunlari Toshkentda bo‘lib o‘tadigan Global Business Services Forum 2026 forumida ishtirok etishini tasdiqladi.