O‘zbekiston Respublikasi Ichki ishlar vazirligi fuqarolarga bir qator davlat xizmatlarini olishda elektron rozilikni rasmiylashtirish imkonini beruvchi “E-Rozilik” platformasini ishga tushirishni rejalashtirmoqda. Tegishli qonun loyihasi jamoatchilik muhokamasiga qo‘yilgan bo‘lib, tizimni 2026-yil 1-avgustdan ishga tushirish rejalashtirilgan.
Yangi platforma orqali foydalanuvchilar “Pasport-viza” avtomatlashtirilgan tizimi bilan integratsiyalashgan Face ID yoki MyID texnologiyalari yordamida masofaviy identifikatsiyadan o‘tishlari mumkin bo‘ladi. Elektron rozilik voyaga yetmaganlar uchun xorijga chiqish biometrik pasportlarini, 15 yoshdan 18 yoshgacha bo‘lgan fuqarolarning mustaqil ravishda xorijga chiqishini, 16 yoshgacha bo‘lgan shaxslar uchun ID-kartalarni olishda, yashash joyi bo‘yicha ro‘yxatdan o‘tishda va boshqa migratsiya tartib-qoidalarida qo‘llaniladi.
“E-Rozilik” orqali rasmiylashtirilgan rozilik qog‘oz hujjat bilan bir xil yuridik kuchga ega bo‘ladi. Mobil ilova orqali xizmatdan foydalanish uchun bazaviy hisoblash miqdorining 50% miqdorida yig‘im, migratsiya bo‘linmalariga murojaat qilganda esa 30% miqdorida yig‘im undiriladi. Rozilikni xizmat yakunlangunga qadar bekor qilish mumkin, ammo to‘langan yig‘im qaytarilmaydi. Elektron ruxsatnomani amal qilish muddati bir oygacha bo‘ladi.