2026-yil 30-sentabrdan boshlab O‘zbekistonning milliy valyutadagi suveren obligatsiyalari J.P. Morgan GBI-EM indeksiga kiritiladi. Bu xorijiy investorlar doirasini sezilarli darajada kengaytirishi va mamlakatga so‘mda moliyalashtirishni jalb qilishni osonlashtirishi mumkin.
Gap O‘zbekiston tomonidan 2026-yilda chiqarilgan, taxminan 1 milliard dollar yoki 12,2 trillion so‘m miqdoridagi uch yillik obligatsiyalar haqida bormoqda. Ularning daromadliligi yillik 12,25 foizni tashkil etdi – bu ichki bozordagi o‘rtacha stavkadan taxminan 14 bazis punktga past. Bitim so‘nggi 15 yildagi Markaziy va Sharqiy Yevropa, Yaqin Sharq va Afrika mintaqasida milliy valyutadagi eng yirik joylashtirish bo‘ldi.
GBI-EM indeksi rivojlanayotgan mamlakatlarning milliy valyutadagi davlat obligatsiyalarini kuzatib boradi. Undan 300 milliard dollardan ortiq aktivlarni boshqaradigan xalqaro investorlar foydalanadi. Hozirda indeksda 20 ta davlat mavjud bo‘lib, ulardan 13 tasi investitsion kredit reytingiga ega. Qo‘shilgandan so‘ng O‘zbekiston GBI-EM tarkibida milliy valyutadagi suveren obligatsiyalarga ega bo‘lgan yagona MDH davlati bo‘ladi.
Indeksga kiritish investorlar bazasini oshirishi, so‘mda mablag‘ jalb qilish imkoniyatlarini kengaytirishi va valyuta risklarini kamaytirishi kerak. Shu bilan birga, mamlakatda davlat qimmatli qog‘ozlari bo‘yicha stavkalar pasaymoqda: 2022-yildagi 17,1 foizdan 2026-yilning birinchi yarmida 12,6 foizgacha, o‘rtacha to‘lov muddati esa 1,5 yildan 2,35 yilgacha o‘sdi. O‘rta muddatli obligatsiyalarning ulushi allaqachon chiqarilgan obligatsiyalarning 69 foizini va ikkilamchi bozordagi savdolarning 63 foizini tashkil etdi.
