Oʻzbekiston delegatsiyasi 9–10-sentabr kunlari Fransiya prezidenti Emmanuel Macron tashabbusi bilan Parijdagi Grand Palais majmuasida boʻlib oʻtgan birinchi Xalqaro kosmik sammitda ishtirok etdi. Mamlakatni Prezident Administratsiyasi Moliya texnologiyalari, raqamlashtirish va sunʼiy intellekt departamenti rahbari Bobur Xodjayev va Raqamli texnologiyalar vaziri Sherzod Shermatov taqdim etdi. Uchrashuvning asosiy mavzusi jahon kosmik sanoatining kelajagi boʻldi.

Sammitda 90 davlat va xalqaro tashkilotlar vakillari, 60 ga yaqin davlat va hukumat rahbarlari, vazirlar, kosmik agentliklar vakillari, astronavtlar, ekspertlar va startaplar ishtirok etdi. Kosmik sanoatning 1000 dan ortiq yetakchi kompaniyalari taqdim etildi. Ishtirokchilar kosmik iqtisodiyot, fan va texnologiyalar, xalqaro hamkorlik, kosmik faoliyatning xavfsizligi va barqarorligini muhokama qildilar. Dasturda global kosmik iqtisodiyot, kelajakdagi infratuzilma, tadqiqotlar va xavfsizlik boʻyicha davra suhbatlari va panel munozaralari boʻldi.

Dasturning alohida qismi 14 mamlakatdan 19 nafar taniqli astronavtlar, jumladan, Tomas Pesquet, Samantha Cristoforetti, Luca Parmitano, Alexander Gerst, Matthias Maurer, Sultan Al Neyadi va Alper Gezeravji bilan uchrashuv boʻldi. Ularni kutib olish marosimida Emmanuel Macron ishtirok etdi. Oʻzbekiston uchun sammitda ishtirok etish kosmik sohadagi oʻz manfaatlarini taqdim etish, boshqa mamlakatlar bilan tajriba almashish va kelajakdagi texnologik hamkorlik uchun yangi aloqalar oʻrnatish imkoniyati boʻldi.