Toshkent metropoliteni 28-sentabr kuni yo'lovchilar oqimi bo'yicha yangi sutkalik rekord o'rnatdi. Bir kun ichida metro xizmatlaridan 1 200 124 nafar yo'lovchi foydalandi, deb xabar berdi metropoliten matbuot xizmati.

Avvalgi maksimal ko'rsatkich atigi bir hafta oldin, 21-sentabr kuni qayd etilgan edi, o'shanda metro taxminan 1,18 million kishini tashigan. Yangi ko'rsatkich bu natijadan taxminan 20 ming yo'lovchiga ko'proq bo'ldi. Rekord darajaga erishilgani munosabati bilan metro xodimlari bir sutkada metroning bir million ikki yuz minginchi foydalanuvchisi bo'lgan yo'lovchini qidirishni tashkil etishdi.

U «Xalqlar do'stligi» bekatida metroga kirgan qiz bo'lib chiqdi. Unga esdalik sovg'asi va bir yil davomida bepul yurish huquqini beruvchi transport kartasi topshirildi. Metropolitenda qayd etilishicha, yo'lovchilar oqimining o'sishi poytaxt aholisi va mehmonlari tomonidan yer osti transportiga bo'lgan talabning oshganidan dalolat beradi.

Shu bilan birga, Toshkentdagi barcha jamoat transporti turlari orasida mutlaq sutkalik rekord hozircha avtobuslarga tegishli. 15-sentabr kuni ular 1 520 113 nafar yo'lovchini tashidi, bu 2025-yil fevral oyida o'rnatilgan avvalgi maksimal ko'rsatkichdan 7,8% ko'pdir.