Toshkent xalq deputatlari Kengashi 8-oktabr kuni har biri besh vagondan iborat 14 ta yangi metro poyezdini sotib olish konsepsiyasini ma'qulladi. Umumiy yetkazib berish hajmi 70 ta vagonni tashkil etadi, loyihaning dastlabki qiymati esa 168,6–356,2 million dollarga baholanmoqda. Yakuniy summa tanlangan ishlab chiqaruvchi va kredit shartlariga bog'liq bo'ladi. Yetkazib beruvchi hozircha aniqlanmagan. Parkni yangilash zarurati amaldagi tarkiblarning eskirganligi, ularning ba'zilari bir necha o'n yillardan beri ishlatilayotganligi, shuningdek, yo'lovchilar oqimining o'sishi bilan izohlanadi.

Yangi poyezdlar eskirgan vagonlarni almashtirishi, liniyalarning o'tkazuvchanlik qobiliyatini oshirishi va tarkiblar orasidagi intervallarni qisqartirishi kerak. Har bir poyezd besh vagondan iborat bo'ladi: amaldagi stansiyalarning platformalari taxminan 100 metrga mo'ljallangan, shuning uchun olti vagonli tarkiblarga o'tish infratuzilmani qimmat rekonstruksiya qilishni talab qiladi. Texnik talablar 1520 mm yo'l kengligini, 825 V kuchlanishli kontakt relsidan quvvatlanishni va maksimal 90 km/soat tezlikni nazarda tutadi.

81-717/714 seriyali, «Nomerli» nomi bilan tanilgan vagonlar bilan solishtirganda, yangi tarkiblar yanada kuchli asinxron dvigatellarga, rekuperativ tormozlashga, zamonaviy konditsionerlashga va yangilangan yoritish hamda yo'lovchilarni axborotlashtirish tizimlariga ega bo'lishi kerak. Shuningdek, tezroq tezlanish va tormozlash, harakatlanishi cheklangan yo'lovchilar uchun past pol va kengroq salon nazarda tutilgan. Germaniyaning Siemens kompaniyasi o'z yechimlari Toshkent metrosining texnik talablariga javob bermasligini va tijorat taklifini taqdim etmaganligini bildirdi.