Janubiy Koreyaning Hansae Mobility kompaniyasi Fargʻona viloyatidagi "Qoʻqon" erkin iqtisodiy zonasining Quvasoy filialida avtomobil komponentlari ishlab chiqarish zavodini ochdi. Loyihaga kiritilgan investitsiyalar 30 million dollarni tashkil etdi. Korxona allaqachon buyurtmalarni bajarishga kirishgan boʻlib, uning ishga tushirilishi mintaqa sanoatini rivojlantirish va Oʻzbekistonning Janubiy Koreya bilan iqtisodiy hamkorligining yangi bosqichi sifatida koʻrilmoqda.
Zavodda 100 dan ortiq ish oʻrni yaratilgan. 2026-yil oxirigacha xodimlar sonini 140 nafarga, kelajakda esa 250 nafarga oshirish rejalashtirilgan. Kompaniya yangi shartnomalar boʻyicha muzokaralar olib bormoqda va ishlab chiqarish hamda xizmat koʻrsatish quvvatlarini kengaytirish, mahalliy yetkazib beruvchilarni jalb qilish va ishlab chiqarilayotgan mahsulotlarni mahalliylashtirish darajasini oshirish niyatida.
Korxonaga tashrifi chogʻida Fargʻona viloyati hokimi Xayrullo Bozorov Hansae Mobility delegatsiyasi bilan ishlab chiqarishni yanada rivojlantirish, assortimentni kengaytirish va avtokomponentlarni Markaziy Osiyo hamda Yevropa bozorlariga yetkazib berish masalalarini muhokama qildi. Tomonlar, shuningdek, toʻqimachilik sanoatidagi potentsial investitsiya loyihalarini va mintaqaga yangi janubiy koreyalik investorlarni jalb qilish imkoniyatlarini koʻrib chiqdilar. Muzokaralar yakunida hamkorlikni davom ettirish boʻyicha kelishuvga erishildi.
