O‘zbekiston investitsiyalar, sanoat va savdo vaziri Laziz Qudratov 13-oktabr kuni Yaponiyaning Sumitomo Corporation va Shikoku Electric Power kompaniyalari rahbarlari bilan muzokaralar o‘tkazdi. Asosiy mavzu qo‘shma energetika loyihalari, jumladan, Samarqand viloyatida quyosh elektr stansiyalari va energiya saqlash tizimlari, shuningdek, Qoraqalpog‘istonning Qo‘ng‘irot tumanida energiya saqlash qurilmalari bilan shamol elektr stansiyalari qurilishi bo‘ldi.
Tomonlar, shuningdek, elektr uzatish liniyalari uchun po‘lat arqonlar ishlab chiqarish, tez yordam mashinalarini yetkazib berish va elektr tarmoqlarini modernizatsiya qilish imkoniyatlarini ko‘rib chiqdilar. Yaponiyaning erkin iqtisodiy zonalarni boshqarish tajribasiga alohida e’tibor qaratildi, bu O‘zbekistonning sanoat infratuzilmasini rivojlantirish uchun foydalanilishi mumkin. Muhokama qilingan loyihalarni amalga oshirishning aniq muddatlari va investitsiyalar hajmi oshkor etilmagan.
Sumitomo Corporation energetika, metallurgiya, tabiiy resurslar, infratuzilma, transport, avtomobilsozlik va raqamli texnologiyalar sohalarida faoliyat yuritadi. Taqdim etilgan ma’lumotlarga ko‘ra, kompaniyaning 63 mamlakat va mintaqada 125 ta ofisi mavjud. Shikoku Electric Power energetikaga ixtisoslashgan bo‘lib, telekommunikatsiya, axborot texnologiyalari, muhandislik va qurilish yo‘nalishlarini ham rivojlantiradi. Kompaniya dunyoning o‘ndan ortiq mamlakatida loyihalarni amalga oshiradi.
