Gruziya kompaniyalari vakillari ikki davlat o‘rtasidagi iqtisodiy aloqalarni rivojlantirishga qaratilgan amaliy tashrif doirasida 29-oktabr kuni IT Park Uzbekistan’ga tashrif buyurdi. Tashrifdan ko‘zlangan asosiy maqsad O‘zbekistonning texnologik infratuzilmasi, IT-sohasida biznes yuritish sharoitlari hamda sarmoya kiritish imkoniyatlari bilan tanishish bo‘ldi. Mazkur safar arafada Toshkentda bo‘lib o‘tgan O‘zbekiston-Gruziya biznes-forumi dasturining davomi bo‘ldi.

28-oktabr kungi forumda ishtirokchilar qurilish, sanoat, qishloq xo‘jaligi, transport, logistika va axborot texnologiyalari sohalaridagi hamkorlik istiqbollarini muhokama qildilar. Dasturdan, shuningdek, B2B va B2G formatlarida kompaniyalar hamda davlat tuzilmalari vakillari o‘rtasidagi muzokaralar ham o‘rin oldi. IT Park’ka tashrif Gruziya biznesining O‘zbekistondagi investitsiya sharoitlari bilan tanishuvining alohida bosqichiga aylandi.

Texnopark vakillari mehmonlarga mavjud infratuzilma, mahalliy bozorga chiqish mexanizmlari va rezident maqomini olish tartibi haqida so‘zlab berdilar. Gruziya delegatsiyasi, shuningdek, IT Park ishtirokchilari uchun ko‘zda tutilgan imtiyozlar va boshqa mehnat sharoitlarini o‘rgandi. Tomonlar O‘zbekiston IT-sohasiga investitsiya kiritish istiqbollarini alohida ko‘rib chiqdilar. Tashrif yakunlari bo‘yicha aniq loyihalar, ehtimoliy sarmoyalar hajmi yoki erishilgan kelishuvlar haqida xabar berilmadi.