IT Park Ventures investitsiya jamg‘armasi NVIDIA VC Allianceʼga qo‘shildi va Notion for Startups dasturining hamkoriga aylandi. Buning sharofati bilan uning portfelidagi startaplar mahsulotlarni ishlab chiqish, jamoaviy ishni tashkil etish va biznesni rivojlantirish uchun qo‘shimcha vositalardan foydalanishlari mumkin bo‘ladi. Birinchi hamkorlik jamg‘armaga sunʼiy intellekt sohasida ishlayotgan startaplarni qo‘llab-quvvatlash dasturi bo‘lmish NVIDIA Inceptionʼda ishtirok etish uchun kompaniyalarni tavsiya qilish imkonini beradi.

NVIDIA Inception ishtirokchilari ishlab chiqish vositalari, o‘quv materiallari, texnik maslahatlar, bulutli kreditlar va hamkorlarning maxsus takliflaridan foydalanish imkoniyatiga ega bo‘lishlari mumkin. IT Park Ventures tomonidan tavsiya etilgan kompaniyalarning arizalari tezlashtirilgan tartibda ko‘rib chiqiladi, ammo yakuniy qaror NVIDIA ixtiyorida qoladi. Dastur ro‘yxatdan o‘tgan, faoliyat yuritayotganiga 10 yildan oshmagan hamda jamoasida asoschidan tashqari kamida bitta dasturchisi bo‘lgan AI-startaplar uchun mo‘ljallangan. Konsalting firmalari, buyurtma asosida ishlab chiquvchilar, bulutli provayderlar, resellerlar va kriptokompaniyalarning ishtirok etishiga ruxsat berilmaydi.

Notion bilan hamkorlik integratsiyalashgan Notion AI bilan birga Business tarifidan olti oy davomida bepul foydalanishni nazarda tutadi. Xizmatdan loyihalarni boshqarish, bilimlar bazasini yuritish va hamkorlikda ishlash uchun foydalanish mumkin. Taklif xodimlari soni 100 kishidan kam bo‘lgan, ilgari Notion pullik obunasini rasmiylashtirmagan va dasturning qolgan talablariga javob beradigan kompaniyalar uchun mavjud. Har ikkala imkoniyat ham faqat IT Park Ventures portfelidagi startaplar uchun mo‘ljallangan. Foydalanish huquqini olish uchun ular to‘g‘ridan-to‘g‘ri jamg‘arma jamoasiga murojaat qilishlari zarur.