"Yandex Xaritalar"da Andijon va Namanganning ilk panoramalari, shuningdek, Buxoro ko'chalarining yangilangan tasvirlari paydo bo'ldi. Kompaniya jami 146 mingdan ortiq panorama tayyorladi. Tasvirga olish uchun maxsus avtomobil uchta shahar va yaqin atrofdagi aholi punktlari ko'chalari hamda yo'llari bo'ylab 3800 km dan ortiq masofani bosib o'tdi. Yangi tasvirlar binolar, muassasalarga kirish joylari, ko'chalar va turli obyektlarga eltuvchi yo'llarni virtual ko'zdan kechirish, notanish hududlar bilan oldindan tanishish imkonini beradi.

Buxoroda foydalanuvchilar Poi Kalon ansamblidan Chor Minor va Labi Hovuz majmuasidagi Ko'kaldosh madrasasigacha virtual sayr qilishlari mumkin. Andijonda Zahiriddin Muhammad Bobur uy-muzeyi va Jome majmuasiga olib boruvchi marshrutlar panoramalari taqdim etilgan. Namanganda esa Bobur nomidagi bog', Otavalixon masjidi va o'tmishda Farg'onaning poytaxti bo'lgan qadimiy Axsikent yodgorligiga eltuvchi yo'llarni o'rganish mumkin.

Avvalroq, 2026-yilda "Yandex Xaritalar" Toshkent va Samarqand panoramalarini yangilagan edi. Yangi tasvirlardan foydalanish uchun ilovaning yuqori o'ng burchagidagi belgi orqali "Panoramalar" qatlamini ochish lozim. Xaritadagi ko'k chiziqlar virtual ko'rish mumkin bo'lgan ko'chalarni bildiradi. Panorama rejimiga o'tgandan so'ng ekranning yuqori chap burchagida 2026-yilni tanlash kerak.