O'zbekiston avtomobil ishlab chiqaruvchisi UzAuto Motors'ning 2026-yil yanvar–sentabr oylari yakunlari bo'yicha sof foydasi bir yil avvalgi 3,517 trln so'mga nisbatan 1,867 trln so'mni tashkil etdi. Shunday qilib, ko'rsatkich 1,65 trln so'mga yoki 46,9 foizga kamaydi. Kompaniyaning 31-oktabrda e'lon qilingan moliyaviy hisobotiga ko'ra, bir vaqtning o'zida avtomobillar, ehtiyot qismlar va boshqa mahsulotlar savdosidan olingan tushum ham 13,2 foizga — 34,71 trln so'mdan 30,12 trln so'mga qisqargan.

Sotilgan mahsulot tannarxi 11,2 foizga pasayib, o'tgan yilning mos davridagi 30,61 trln so'mga nisbatan 27,17 trln so'mni tashkil etdi. Biroq ishlab chiqarish xarajatlarining qisqarishi tushumning pasayishiga qaraganda sekinroq kechdi. Natijada avtoishlab chiqaruvchining yalpi foydasi 28,2 foizga — 4,1 trln so'mdan 2,94 trln so'mga kamaydi. Yalpi foyda bo'yicha rentabellik ham 11,8 foizdan 9,8 foizgacha pasaydi.

Operatsion faoliyat ko'rsatkichlari esa bundan ham sezilarliroq yomonlashdi. UzAuto Motors'ning operatsion foydasi 56,2 foizga — 2,96 trln so'mdan 1,3 trln so'mga tushib ketdi. Shu bilan birga, mahsulotni sotish xarajatlari, aksincha, 14,3 foizga o'sib, 1,17 trln so'mga yetdi. Soliq to'langunga qadar foyda 47,4 foizga qisqarib, 2025-yilning to'qqiz oyidagi 4,09 trln so'mga nisbatan 2,15 trln so'mni tashkil qildi.