Yaponiya kompaniyasi Proud & Partners O‘zbekistondan yuk avtomobillari haydovchilarini Yaponiyada ishlashga tayyorlashni boshladi. Loyiha ishtirokchilariga oyiga kamida $2000 ish haqi kafolatlanadi. Tashabbus uzoq muddatga mo‘ljallangan — kelgusida 5000 tagacha mutaxassisni tayyorlash va ish bilan ta’minlash rejalashtirilgan.
Proud & Partners prezidenti Ryudzi Sudzuki kompaniya Yaponiya iqtisodiyotiga xorijiy ishchi kuchini tizimli va qonuniy jalb qilish bilan shug‘ullanayotganini ma’lum qildi. Uning so‘zlariga ko‘ra, bugungi kunda Yaponiya mehnat bozoriga 5000 ga yaqin xorijiy ishchi olib kelingan. Asosiy e’tibor nomzodlarni ularning kelib chiqish mamlakatlarida ixtisoslashgan til va kasbiy markazlar orqali o‘qitishga, so‘ngra ularni aniq ish o‘rinlariga joylashtirishga qaratilmoqda.
Loyiha Yaponiyada demografik inqiroz natijasida yuzaga kelgan kadrlar tanqisligi sharoitida amalga oshirilmoqda. Xodimlarning eng katta yetishmovchiligi logistika va qurilishda kuzatilmoqda. Dastlabki bosqichda dastur yuk transporti haydovchilariga mo‘ljallangan bo‘lib, O‘zbekiston fuqarolari uchun majburiy minimal daromad darajasi belgilangan. Kompaniya bunday yondashuv bir vaqtning o‘zida kadrlar tanqisligini bartaraf etish va xorijiy mutaxassislar uchun barqaror va qonuniy bandlikni ta’minlash imkonini beradi, deb hisoblamoqda.
