Toshkentda O‘zbekiston-Xitoy biznes-forumi bo‘lib o‘tdi, unda ikki davlat vakillari investitsiyaviy hamkorlikni kengaytirish va yangi qo‘shma loyihalarni ishga tushirish masalalarini muhokama qildilar. Tadbirda O‘zbekiston Investitsiyalar, sanoat va savdo vazirligi vakillari, shuningdek, Xitoyning Ichki Mo‘g‘uliston avtonom viloyati delegatsiyasi ishtirok etdi.
Forum metallurgiya, energetika, logistika, biotexnologiyalar, avtomobilsozlik, oziq-ovqat sanoati va boshqa sohalarda faoliyat yurituvchi 22 ta Xitoy kompaniyasini birlashtirdi. Ishtirokchilar tog‘-kon sanoati, “yashil” energetika, qishloq xo‘jaligi, tibbiyot, yuqori texnologiyalar va sanoat kooperatsiyasida loyihalarni amalga oshirish imkoniyatlarini ko‘rib chiqdilar.
Tomonlar mamlakatlar o‘rtasidagi iqtisodiy aloqalarning jadal o‘sishini qayd etdilar. So‘nggi besh yil ichida O‘zbekiston va Xitoy o‘rtasidagi tovar ayirboshlash uch barobar oshdi va 2025 yil yakuniga ko‘ra 18 milliard dollarga yaqinlashdi. Shu davrda to‘g‘ridan-to‘g‘ri Xitoy investitsiyalari hajmi besh barobar – 17 milliard dollargacha o‘sdi. Hozirda O‘zbekistonda Xitoy kapitali ishtirokidagi 6 mingdan ortiq korxona faoliyat yuritmoqda. Forum yakunlari bo‘yicha kompaniyalar yangi investitsiya tashabbuslarini tayyorlashni davom ettirish va qo‘shma ishlab chiqarishni rivojlantirishga kelishib oldilar.
