20-avgustdan boshlab Toshkent uzra Avion kompaniyasining laboratoriya samolyoti yordamida aeronavigatsiya uskunalarini rejali tekshirish ishlari boshlanadi. Parvozlar bir necha kun davom etadi. O‘zbekiston Transport vazirligi poytaxt aholisidan xavotir olmaslikni so‘radi: past balandlikdagi takroriy parvozlar faqat texnik tekshiruvlar bilan bog‘liq.
Samolyot bir xil hududlar ustidan bir necha marta uchib o‘tishi mumkin. Mutaxassislar aeroportlarning radiotexnik vositalari va yorug‘lik-signal uskunalari ishini baholab, ularning xalqaro talablar va IKAO standartlariga muvofiqligini tekshiradi.
Bunday vazifalarni bajarish uchun Avion maxsus yuqori aniqlikdagi uskunalar bilan jihozlangan Diamond DA62 MPP samolyotidan foydalanadi. Kompaniya "O‘zaeronavigatsiya" markazi tomonidan aerodrom tizimlarini tekshirish va kalibrlash, shuningdek, maxsus aviatsiya vazifalarini bajarish uchun tashkil etilgan.
Ilgari bunday ishlar uchun O‘zbekiston Qozog‘istondan samolyot jalb qilishga majbur bo‘lgan. Endi o‘z operatoriga ega bo‘lish asosiy tekshiruvlarni mamlakat ichida o‘tkazish imkonini beradi.
