Oʻzbekistonning uPay.net fintex-xizmati AQSHda HUMO va UZCARD milliy toʻlov tizimlarining bank kartalariga toʻgʻridan-toʻgʻri pul oʻtkazish imkoniyatini ishga tushirdi. Xizmat birinchi navbatda AQSHda yashovchi va ishlayotgan Oʻzbekiston fuqarolariga moʻljallangan.

Platforma Nyu-Yorkda Oʻzbekistonlik tadbirkorlar Xusrav Mahmudov va Akmal Abdullayev tomonidan yaratilgan. Ilgari uPay.net orqali Oʻzbekistonda mobil aloqa, internet, kommunal va boshqa xizmatlar uchun toʻlovlarni amalga oshirish mumkin edi. Endi foydalanuvchilar toʻgʻridan-toʻgʻri HUMO va UZCARD kartalariga pul yuborish imkoniyatiga ega boʻldilar.

Ishlab chiquvchilarning taʼkidlashicha, xizmat AQSH va Oʻzbekistonning moliyaviy tartibga solish talablarini hisobga olgan holda ishlaydi, shuningdek, tranzaksiyalarni himoya qilish choralarini nazarda tutadi. Uni ishga tushirish uchun alohida bank, texnologik va komplayens infratuzilmasi yaratildi.

Loyiha mualliflari pul oʻtkazmalari geografiyasini kengaytirish, yangi moliyaviy vositalarni qoʻshish va Markaziy Osiyo aholisi uchun raqamli xizmatlarni rivojlantirish niyatida.