Restoranlar va chakana savdoda buyurtmalar hamda yetkazib berishni boshqarish uchun dasturiy ta'minot yaratuvchi O'zbekistonning Delever kompaniyasi $380 000 miqdorida investitsiya jalb qildi. Raundning asosiy qismini — $300 000 — AloqaVentures venchur fondi taqdim etdi, yana $80 000 miqdoridagi mablag'ni Nexus Club kiritdi. Birinchi investor uchun bu startap bilan ilk bitim emas: 2024-yilda u Delever'ga $100 000 ajratib, pre-seed raundida ishtirok etgan edi.

Platforma turli savdo kanallaridan buyurtmalarni qabul qilish, agregatorlar bilan integratsiya, kassalar faoliyati, kuryerlar va yetkazib berishni boshqarishni yagona tizimga birlashtiradi. Hozirda xizmatdan 7 ta mamlakatdagi 1400 dan ortiq restoran va do'konlar foydalanmoqda, O'zbekiston hamda Qozog'iston kompaniya uchun asosiy bozorlar bo'lib qolmoqda. AloqaVentures startap zararsizlik darajasiga yetganini va xalqaro bozorlarda o'sish ko'rsatganini qayd etdi. Qo'shimcha investitsiyalar jamoaning o'z faoliyat qamrovini kengaytirish va biznesni masshtablashtirish rejalari bilan bog'liq.

Delever olingan mablag'larni mahsulotni takomillashtirish, uning funksionalligini kengaytirish va yangi mamlakatlarga chiqishga yo'naltiradi. Kompaniya asoschilaridan biri va bosh direktori Faxriddin Yusupov AloqaVentures'ning qayta investitsiyalari jamoa uchun ayniqsa muhim ekanligini ta'kidladi, chunki fond biznes va uning natijalari bilan allaqachon yaxshi tanish. Delever o'z platformasini yetkazib berish bilan shug'ullanuvchi korxonalar uchun yagona operatsion tizim sifatida taqdim etmoqda. Kompaniya IT Park Uzbekistan va Astana Hub'da, Delever Ltd. esa "Ostona" xalqaro moliya markazida ro'yxatdan o'tgan.