7-noyabr kuni O‘zbekistonda 500 kV kuchlanishli va 1602 MVA quvvatga ega "Xalqa" yuqori kuchlanishli nimstansiyasi ishga tushirildi. Obyekt Toshkent shahri va Toshkent viloyatining bir qismini elektr energiyasi bilan ta’minlash ishonchliligini oshirish, shuningdek, mavjud energetika tarmoqlari o‘rtasida yuklamani qayta taqsimlash uchun mo‘ljallangan. Ko‘lami bo‘yicha bu mamlakatdagi eng yirik yuqori kuchlanishli infratuzilma loyihalaridan biridir.

Nimstansiyaning ishga tushirilishi Toshkent issiqlik elektr stansiyasiga tushadigan yuklamani kamaytirish va yoqilg‘i sifatida mazutdan foydalanishdan voz kechish imkonini berishi kutilmoqda. Bu nafaqat energiya tizimi faoliyatining samaradorligini oshirishi, balki atmosferaga ifloslantiruvchi moddalar chiqarilishini ham qisqartirishi kerak. Jahon banki ishtirokida amalga oshirilgan loyihaning qiymati $171,4 mln ni tashkil etdi.

Loyiha doirasida nimstansiyadan tashqari 220 kV kuchlanishli 213 km va 500 kV kuchlanishli yana 72 km havo elektr uzatish tarmoqlari qurildi. Shu tariqa, yangi yuqori kuchlanishli infratuzilmaning umumiy uzunligi 285 km ga yetdi. U hududlar o‘rtasida elektr energiyasini uzatish imkoniyatlarini kengaytiradi va ortib borayotgan talabni qondirishga yordam beradi. Hozirda barcha yangi obyektlarni O‘zbekistonning yagona energetika tizimiga integratsiya qilish bo‘yicha yakuniy ishlar davom etmoqda.