Oʻzbekiston iqlim oʻzgarishiga qarshi kurash boʻyicha milliy majburiyatlarni investitsiyalarni jalb qilishga tayyor loyihalarga aylantirishga qaratilgan BRIDGE (Climate Implementation Bridge) xalqaro iqlim platformasining dastlabki besh ishtirokchisi safiga kirdi. Tashabbusning kengayishi haqida Turkiyaning Antaliya shahridagi COP31 iqlim konferensiyasida eʼlon qilindi. Turkiya platformani ishga tushirish uchun $3 mln grant mablagʻi ajratadi.

Dastlab BRIDGE platformasiga Oʻzbekiston, Efiopiya, Fiji, Indoneziya va Pokiston qoʻshilgan edi. Endilikda Chili, Livan, Meksika va Zambiya ham uning ishtirokchilariga aylandi. BMTTD koʻmagida yaratilgan platforma iqlim investitsiyalari yoʻlidagi toʻsiqlarni aniqlashga, davlat institutlarini mustahkamlashga hamda hukumatlar, moliyaviy tashkilotlar va texnik hamkorlar oʻrtasida hamkorlikni yoʻlga qoʻyishga yordam beradi. Dastlabki beshta mamlakat ustuvor tarmoqlar, moliyalashtirish ehtiyojlari va loyihalarni amalga oshirishdagi toʻsiqlarni baholashni boshlab yuborgan.

Iqlimiy investitsiyalarga boʻlgan keng koʻlamli ehtiyoj tufayli mazkur tashabbus Oʻzbekiston uchun ayniqsa dolzarbdir. Mamlakatning COP31 doirasidagi milliy pavilyoni maʼlumotlariga koʻra, 2035-yilga qadar respublikaga iqlim oʻzgarishiga moslashish choralarini moliyalashtirish uchun qariyb $30,1 mlrd zarur boʻladi. BRIDGE platformasi tegishli loyihalarni tayyorlash va ularni amalga oshirish uchun xalqaro moliyalashtirishni jalb qilishga yordam berishi kerak.