IT Park Uzbekistan Buxarestda bo'lib o'tgan GoTech World 2026 xalqaro ko'rgazmasida mamlakatning texnologik imkoniyatlarini taqdim etdi. Tadbir doirasida tashkilot vakillari O'zbekiston bozoriga kirish va qo'shma loyihalarni rivojlantirishdan manfaatdor bo'lgan to'rtta Ruminiya kompaniyasi bilan muzokaralar o'tkazdilar.

Yevropa biznesi uchun maxsus sessiyada delegatsiya mamlakatning IT-ekotizimi, soliq imtiyozlari, kadrlar salohiyati hamda IT Park rezidentlarini qo'llab-quvvatlash choralari haqida so'zlab berdi. Xalqaro autsorsing imkoniyatlari, dasturiy ta'minotni ishlab chiqish va O'zbekistonda yangi texnologik bo'linmalarni joylashtirish istiqbollariga alohida e'tibor qaratildi.

Muzokaralar EASYDO Digital Technologies, Infraweb MSP, 112HUB va IT Teams kompaniyalari bilan bo'lib o'tdi. Tomonlar ishlab chiqish markazlari va muhandislik ofislarini ochish, BPO xizmatlarini rivojlantirish, O'zbekiston IT-kompaniyalarining xalqaro loyihalarda ishtirok etishi hamda energetika sohasida raqamli yechimlarni joriy etish masalalarini muhokama qildilar. Bir qator Ruminiya kompaniyalari mahalliy hamkorlar bilan muzokaralar olib borish va biznesni tashkil etish istiqbollarini baholash maqsadida bo'lg'usi Outsource to Uzbekistan (OOT) tadbiri doirasida O'zbekistonga tashrif buyurish imkoniyatini ko'rib chiqmoqda.