Oʻzbekiston 2050-yilgacha energetikani rivojlantirish boʻyicha Milliy bosh rejasini ishlab chiqadi va eʼlon qiladi. Prezident Shavkat Mirziyoyev hujjat tayyorlanishi haqida 16-oktabr kuni soha investorlari bilan uchrashuvda maʼlum qildi. Reja qaysi hududlarda elektr energiyasi isteʼmoli oʻsishi kutilayotganini, qanday infratuzilma talab qilinishini va yangi generatsiya quvvatlarini qayerda joylashtirish foydaliroq ekanligini koʻrsatishi kerak.
Hujjat bosqichma-bosqich tayyorlanadi: 2027-yil 1-martgacha elektr tarmoqlariga ulanish imkoniyatlari xaritasi, 1-iyulgacha esa toʻliq bosh reja taqdim etiladi. Bu loyihalarni tanlashga yangi yondashuv uchun asos boʻladi: davlat ehtiyojlarni oldindan aniqlaydi, maydonchalarni tayyorlaydi va ochiq tanlovlar oʻtkazadi. Birinchi bosqich umumiy quvvati 2200 MVt boʻlgan oltita quyosh va shamol elektr stansiyalari boʻyicha savdolar boʻladi.
Oʻzbekiston 2050-yilgacha energetikani rivojlantirish bosh rejasini ilk bor eʼlon qiladi / Foto: Matbuot
2030-yilga kelib Oʻzbekiston 22 ming MVt yangi generatsiya quvvatlarini yaratishni, yillik elektr energiyasi ishlab chiqarishni 129 mlrd kVt·soatdan oshirishni va qayta tiklanuvchi manbalar ulushini 54% ga yetkazishni rejalashtirmoqda. Masdar vakillari uzoq muddatli rejalashtirishni qoʻllab-quvvatlab, shaffof tenderlar va bashorat qilinadigan shartlar investitsiyalarni jalb qilish uchun muhim ekanligini taʼkidladilar.
