Oʻzbekistonning milliy pochta operatori UzPost davlat aksiyalari paketi Wildberries kompaniyasining 100 foizlik shoʻba korxonasi boʻlgan WB INT EXPORTga ishonchli boshqaruvga berildi. Bu kompaniyaning 2026-yil 21-sentabrdagi aksiyadorlar yigʻilishi bayonnomasidan olingan koʻchirmadan maʼlum boʻldi. Hujjatda 2025-yil 30-dekabrdagi ishonchli boshqaruv shartnomasi tilga olingan boʻlib, unga koʻra Rossiya marketpleysi korxonaning davlat ulushiga nisbatan aksiyadorlik huquqini qoʻlga kiritgan.

Koʻchirmaga koʻra, 2026-yil 31-mart kuni WB INT EXPORT UzPost kuzatuv kengashiga oʻzining beshta nomzodini kiritishni taklif qildi. Keyinchalik, 11-avgust kuni kompaniya aksiyadorlarning navbatdan tashqari yigʻilishini chaqirishni va kengashning yangi tarkibini saylash masalasini koʻrib chiqishni talab qildi. Hujjatda, shuningdek, WB INT EXPORTning davlat ulushining ishonchli boshqaruvchisi sifatidagi maqomini tasdiqlovchi Oʻzbekistonning “Aksiyadorlik jamiyatlari va aksiyadorlar huquqlarini himoya qilish toʻgʻrisida”gi qonunining 65-moddasiga havola keltirilgan.

Yigʻilish yakunlariga koʻra, uch yil muddatga toʻqqiz kishidan iborat kuzatuv kengashi tuzildi. Beshta oʻrinni Wildberries va unga aloqador tuzilmalar vakillari egalladi: investitsiya va yuridik boʻlinmalar, RVB moliyaviy bloki, VB Bank mintaqaviy rivojlanish boʻlimi, shuningdek, WB INT EXPORT bosh direktori Akmal Primkulov. Qolgan toʻrtta lavozim davlat organlari vakillari va mustaqil kengash aʼzosi oʻrtasida taqsimlandi.