O‘zbekistonda elektron xizmatlar ko‘rsatuvchi xorijiy kompaniyalar 2026-yilning yanvar–sentabr oylarida budjetga 232,8 mlrd so‘m soliq o‘tkazdi. Bu o‘tgan yilning mos davridagiga nisbatan qariyb 1,9 barobar ko‘p bo‘lib, o‘shanda tushumlar 124,8 mlrd so‘mni tashkil etgan edi. Shu bilan birga, ko‘rsatilgan xizmatlar hajmi ham 1,05 trln so‘mdan 1,94 trln so‘mga yetdi. Xorijiy yetkazib beruvchilar soni ham oshib bormoqda: 1-oktabr holatiga ko‘ra ularning soni 109 tani tashkil etgan bo‘lsa, 2026-yil boshida 78 ta, 2025-yil 1-yanvar holatiga esa 63 ta bo‘lgan.

Eng yirik soliq to‘lovchi Apple bo‘ldi: xizmatlar hajmi 451,4 mlrd so‘mni tashkil etgani holda kompaniya 54,2 mlrd so‘m o‘tkazdi. Keyingi o‘rinni mos ravishda 438 mlrd va 52,6 mlrd so‘m ko‘rsatkichlari bilan Google egalladi, uchinchi o‘rinda esa Meta* joylashdi — 389,4 mlrd va 46,7 mlrd so‘m. Shuningdek, kuchli beshlikka 22,8 mlrd so‘m soliq bilan Valve Corp. va 14 mlrd so‘m bilan Anthropic kirdi. OpenAI oltinchi o‘rinda qayd etilib, 83,1 mlrd so‘mlik xizmatlar hajmida 10 mlrd so‘m o‘tkazdi.

Eng yirik soliq to‘lovchilar o‘ntaligiga, shuningdek, Midasbuy, Booking.com, TikTok va Anysphere ham kirdi. Ularning soliq to‘lovlari mos ravishda 4,8 mlrd, 4,2 mlrd, 2,4 mlrd va 2,2 mlrd so‘mni tashkil qildi. O‘zbekiston Soliq kodeksining 281-moddasiga muvofiq, elektron xizmatlar ko‘rsatuvchi xorijiy kompaniyalar yakunlangan chorakdan keyingi oyning 20-sanasidan kechiktirmasdan hisobot topshirishlari va soliqlarni to‘lashlari shart.